वाफाळलेला चहा
मराठी कविता -- चहास्तोत्रम
शीणसुस्तीमहानिद्रा, क्षणात पळवी चहा,
प्रभाते तोंड धुवोनि, घेता वाटे प्रसन्नता ।। १ ।।
अर्धांगिनीहस्ते घेता, निद्रा तात्काळ विरघळे,
पुन्हा स्नानांतरे घेता, अंगी चैतन्य सळसळे ।। २ ।।
लिंबुयुक्ता विनादुग्धा, अरुची पित्त घालवी,
शर्करेविना घेता मधुमेह न गांजवी ।। ३ ।।
शितज्वर शिरःशूळा, खोकला नाक फुरफुरा,
गवतीपत्र अद्रकायुक्ता, प्राशिता जाई सत्वरा ।। ४ ।।
भोजनापूर्व प्राशिता, मंदाग्नी पित्तकारका,
घोटता घोटता वाढे, टैनिन जहरकारका ।। ५ ।।
चहाविना आप्तस्नेह्यांचे, स्वागताची अपूर्णता,
यास्तव भूतल जन हे, म्हणती यासी अमृता,
म्हणती यासी अमृता ।। ६ ।।
इति सुहासविरतिम चहास्तोत्रं चहाबाज
प्रीत्यर्थम समर्पितम ।
