दीवार -- दोन भावातील संघर्ष

 

 

 दीवार -- दोन भावातील संघर्ष 

          "आज मेरे पास बंगला है, गाडी है, बॅलन्स है, तुम्हारे पास क्या है ?", "मेरे पास माँ है ।" हे संवाद कानावर ऐकू पडले कि हमखास आठवण येते अमिताभ बच्चन यांच्या दीवार या चित्रपटाची. १९७५ साली हा चित्रपट प्रदर्शित झाला. या चित्रपटाचे निर्माता होते गुलशन राय तर दिग्दर्शक होते यश चोपडा. या चित्रपटाची कथा पटकथा सलीम जावेद यांनी लिहिली. या चित्रपटातील गाणी साहिर लुधियानवी यांनी लिहिली असून राहुल देव बर्मन यांनी संगीत दिले आहे. आशा भोसले, मन्ना डे, किशोर कुमार, उषा मंगेशकर, भूपेंद्र सिंह, उर्सुला वाज यांनी गाणी गायली आहेत. 

          या चित्रपटात अमिताभ बच्चन, शशी कपूर, निरुपा रॉय, परवीन बॉबी, नीतू सिंह, इफ्तेकार, मदन पुरी यांच्या मुख्य भुमिका आहेत. 

          हा चित्रपट दोन भावांच्या (अमिताभ बच्चन व शशी कपूर) संघर्षावर आधारित आहे. लहानपणी झालेल्या अत्याचारामुळे दोन भाऊ वेगवेगळे मार्ग निवडतात. एक मार्ग असतो सत्याचा तो शशी कपूर निवडतो म्हणजेच तो पोलीस इन्स्पेक्टर बनतो तर एक मार्ग असतो असत्याचा तो अमिताभ बच्चन निवडतो म्हणजेच चोऱ्या, स्मगलिंग करतो. शशी कपूर सत्याच्या मार्गावर चालूनही साधाच राहतो तर अमिताभ बच्चन असत्याच्या मार्गावर चालून पैसा, गाडी, बंगला कमावतो. सत्य व असत्य यांची भिंत (दीवार) दोघांमध्ये उभी राहते असे या चित्रपटात दाखवले आहे. अमिताभने विजय वर्मा पुर्ण ताकतीने उभा केला आहे. या भुमिकेमुळे त्याला 'अँग्री यंग मॅन' चा 'किताब दिला गेला. 

          अमिताभच्या आवाजातील संवादही प्रचंड गाजले. दीवार चित्रपटाचे नाव काढले कि आजही त्यांचे तोंडून बाहेर पडलेले संवाद आठवतात. 

१) मेरा बाप चोर है 

२) आज मेरे पास बंगला है, गाडी है, बॅलन्स है, तुम्हारे पास क्या है?

३) ये चाबी अपनी जेब में रख लें पीटर, अब ये ताला मैं तेरी जेबसे चाबी  निकालकर हि खोलुंगा ।

४) "पीटर तुम मुझे वहाँ ढूंढ रहे हो और मैं तुम्हारा यहाँ इंतज़ार कर रहा हूँ."

५) "मैं आज भी फैंके हुए पैसे नहीं उठाता"

          हे डायलॉग ऐकण्यासाठी व अमिताभची भुमिका बघण्यासाठी प्रेक्षक चित्रपटगृहात गर्दी करत होते. उत्कृष्ठ अभिनयामुळे अमिताभला फिल्म फेअरतर्फे दिले जाणारे 'बेस्ट ऍक्टर' चे नामांकन मिळाले.

 

 

 

 

 

 

 

 

 

 

 

 

शान - शोलेची दुसरी आवृत्ती

 

 शान - शोलेची दुसरी आवृत्ती

          हा चित्रपट १२ डिसेंबर १९८० रोजी प्रदर्शित झाला. या चित्रपटाचे निर्माते जी पी सिप्पी होते तर दिग्दर्शक रमेश सिप्पी होते. या चित्रपटाची कथा सलीम जावेद यांनी लिहिली. या चित्रपटाला संगीत आर डी बर्मन यांचे होते तर आनंद बक्षी यांनी गाणी लिहिली आहेत. किशोर कुमार, मोहमद रफी, आशा भोसले, उषा मंगेशकर आर डी बर्मन (यम्मा यम्मा), उषा ऊथुप (दोस्तो सें प्यार किया - टायटल सॉंग) यांनी गाणी गायली आहेत. 

          या चित्रपटात सुनील दत्त, राखी, अमिताभ बच्चन, शशी कपूर, शत्रुघ्न सिन्हा, परवीन बॉबी, बिंदिया गोस्वामी, कुलभूषण खरवंदा, जॉनी वॉकर यांच्या मुख्य भूमिका होत्या. कुलभूषण खरवंदाची टकलू शाकालची  भूमिका प्रचंड गाजली. अमिताभने व शशी कपूरने भुरटया चोराची भूमिका केली आहे. 

          या चित्रपटात अमिताभने सुनील दत्तच्या भावाची भुमिका केली आहे. सुनील दत्त एक प्रामाणिक व बहादूर पोलीस अधिकारी असतो. तो शाकालचे काळे धंदे संपवण्याचा प्रयत्न करत असतो परंतु तो शाकालकडून मारला जातो. अमिताभ बच्चन व शशी कपूर शत्रुघ्न सिन्हाच्या मदतीने शाकालशी लढून आपल्या भावाचा बदला घेतो व शाकालचे साम्राज्य उद्वस्थ करतो असे या चित्रपटात दाखवले आहे. अमिताभची नायिका परवीन बॉबी आहे तर शशी कपूरची नायिका बिंदिया गोस्वामी आहे. 

          परवीन बॉबीची प्रतीक्षा करीत एका हॉटेलमध्ये बसलेला अमिताभ एका अनोळखी स्त्रीबरोबर वेळ घालवण्यासाठी गप्पा मारता मारता त्यांच्या भविष्यातील फॅमिली प्लॅनिंगपर्यंत पोचतो हा विनोदी प्रसंग आहे. अमिताभ बच्चन, शशी कपूर, परवीन बॉबी, बिंदिया गोस्वामी यांच्यावर चित्रित झालेले 'यम्मा, यम्मा' हे गाणे ८० सालातील प्रचंड लोकप्रिय गाणे होते. शेवटी अमिताभ बच्चन मगरीबरोबर फायटिंग करतो तो सीन थरारक व श्वास रोखून धरायला लावणारा होता. 

          या चित्रपटाची तुलना शोले बरोबर केली गेली तसेच शाकालचा भव्यदिव्य सेट, अमिताभची हलकीफुलकी विनोदी भुमीका व त्याचे फायटिंग सीन यामुळे हा चित्रपट पाहण्यासाठी प्रेक्षक चित्रपटगृहात गर्दी करत होते. रमेश सिप्पी यांचा शोले नंतरचा हा प्रचंड गाजलेला दुसरा सिनेमा होता.