हे गीत बाळा गाऊ कशी अंगाई या चित्रपटातील आहे. हा चित्रपट ४ एप्रिल १९७७ रोजी प्रदर्शित झाला. या चित्रपटाची निर्मिती एम. एस. साळवी यांनी केली तर या चित्रपटाचे दिग्दर्शन कमलाकर तोरणे यांनी केले. या चित्रपटात आशा काळे व विक्रम गोखले यांनी मुख्य भूमिका निभावल्या. या चित्रपटातील गीते जगदीश खेबूडकर यांनी लिहिली असून गीताला संगीत एन. दत्ता यांनी दिले आहे. यातीलच हे एक अवीट गोडीचे पुढील गीत
अरे मनमोहना रे.. मोहना रे.. मोहना
कळली देवा तुला, राधिका रे राधिका
कळली राधिका रे कळल्या गोपिका
साधी भोळी मीरा तुला कळली नाही
तुझी माझी प्रीत कधी जुळली नाही
अरे मनमोहना रे.. मोहना रे.. मोहना ।। १ ।।
सात सुरांवर तन-मन नाचे
तालावरती मधुबन नाचे
एक अबोली होती फुलली
तिच्याकडे नजर तुझी वळली नाही
तुझी माझी प्रीत कधी जुळली नाही
अरे मनमोहना रे.. मोहना रे.. मोहना ।। २ ।।
धुंद सुगंधी यमुना लहरी
उजळून आली गोकुळ नगरी
जीवन माझे अंधाराचे
काळी काळी रात कधी टळली नाही
तुझी माझी प्रीत कधी जुळली नाही
अरे मनमोहना रे.. मोहना रे.. मोहना ।। ३ ।।
उन्हात काया, मनात छाया
कशी समजावू वेडी माया
युग युग सरले, डोळे भरले
आशेची कळी कधी फुलली नाही
तुझी माझी प्रीत कधी जुळली नाही
अरे मनमोहना रे.. मोहना रे.. मोहना ।। ४ ।।
गीत -- जगदीश खेबूडकर
संगीत -- एन. दत्ता
स्वर -- आशा भोसले
चित्रपट -- बाळा गाऊ कशी अंगाई
No comments:
Post a Comment