आनंद व्दिगुणीत करणारा केरळवासीयांचा सण -- ओणम

रांगोळी काढताना महिला

 

ओणम सणादिवशी केळीच्या पानात वाढलेले भोजन

ओणम सणाच्या आनंदाप्रीत्यर्थ नृत्य करणाऱ्या महिला


आनंद व्दिगुणीत करणारा केरळवासीयांचा सण -- ओणम

            आपल्याइथे जशी दिवाळी साजरी केली जाते तसेच केरळमध्ये ओणम सण साजरा केला जातो. आपण दिवाळीत चकली, लाडू, करंजी असे गोडधोड पदार्थ करतो व आपल्या जवळच्या आप्तेष्टांना, नातेवाईकांना बोलावून खायला देतो तसेच केरळमध्ये लज्जतदार व गोडाधोडाचे पदार्थ बनवून आपल्या जवळच्या आप्तेष्टांना, नातेवाईकांना खायला देतात त्याबरोबर बदाम, पिस्ते, चारोळे घालून विशिष्ठ प्रकारची केलेली खीर प्यायला देतात त्यालाच ते पायसम म्हणतात. या दिवसात केरळवासीय नृत्य, संगीत, महाभोज यासारख्या मनोरंजनात्मक कार्यक्रमांचे आयोजन करतात तसेच एकमेकांना शुभेच्छा देऊन आपला आनंद व्दिगुणीत करतात. 

              केरळमध्ये ओणम सणाचे महत्व फार आहे. आपल्याइथे दिवाळीचा सण ५ दिवस साजरा करतात तसेच केरळमध्ये १० दिवस पारंपारिक पद्धतीने साजरा करतात. शेतात धान्य उगवल्याच्या आनंदाप्रीत्यर्थ हा सण साजरा केला जातो. ओणमच्या पहिल्या दिवसाला "अथम" म्हणतात तर शेवटच्या दिवसाला "थिरुओणम" असे म्हणतात. या दिवसात केरळवासीय घराला रंगरंगोटी करतात. महिला फुलांनी घर सजवतात. या सणादरम्यान मंदिरात तसेच प्रत्येक घरात पारंपारिक पद्धतीने पुजापाठ केला जातो. 
            राजा महाबली याच्या आदराप्रीत्यर्थ ओणम सण साजरा केला जातो. असे म्हणले जाते कि, थिरुओणम या दिवशी वर्षातून एकदा असुर राजा महाबली त्याच्या प्रजेला भेटण्यासाठी पाताळामधून धरतीवर अवतरतो. त्याला खुश करण्यासाठी आंबटगोडचे विविध पदार्थ बनवले जातात. देवाला या पदार्थांचा नैवेद्द दाखवला जातो व सगळे मिळून सामूहिक भोजन करतात. या दिवसात केळीच्या पानात भोजन करण्याची प्रथा आहे. 
            आम्ही लोणंदला असताना आमचे शेजारी नायर कुटुंब राहायला होते. त्यांनी आम्हाला ओणम सणाबद्दल माहिती व महत्व सांगितले. ओणम सणादिवशी त्यांच्या पारंपारिक पद्धतीने केळीच्या पानावर जेवण वाढले. जेवण झाल्यावर पायसम प्यायला दिले. पायसमची चव गोड व लज्जतदार होती. त्यांनी घरासमोर फुलांची छान रांगोळी घातली होती. त्या दिवसात त्यांचे घर उत्साहाने व आनंदाने भरून गेले होते. आम्ही त्यांना ओणम सणाबद्दल शुभेच्छा दिल्या व त्यांच्या आनंदात सहभागी झालो.