अवीट गोडीचे गाणे -- अष्टविनायका तुझा महिमा कसा

 

 
अवीट गोडीचे गाणे -- अष्टविनायका तुझा महिमा कसा

          अष्टविनायका तुझा महिमा कसा हे अष्टविनायक चित्रपटातील गीत आहे. अष्टविनायक हा चित्रपट १९७९ साली प्रदर्शित झाला. या चित्रपटाचे दिग्दर्शक राजदत्त होते तर निर्माता सचिन पिळगावकर यांचे वडील शरद पिळगावकर होते. या चित्रपटात सचिन पिळगावकर, वंदना पंडित, रमेश भाटकर, शरद तळवळकर, वसंतराव देशपांडे, पद्मा चव्हाण, राजा गोसावी यांच्या मुख्य भूमिका होत्या. या चित्रपटातील गाणी शांता शेळके, शांताराम नांदगावकर, जगदीश खेबुडकर, मधुसुदन कालेलकर यांनी लिहिली असून अनुराधा पौडवाल, जयवंत कुलकर्णी, चंद्रशेखर गाडगीळ, शरद जांभेकर, वसंत देशपांडे यांनी गायली आहेत. अनिल-अरुण यांनी संगीत दिले आहे. 
           अष्टविनायका तुझा महिमा कसा हे गीत सचिन पिळगावकर व वंदना पंडित यांच्यावर चित्रित झाले आहे. हे गीत जगदीश खेबुडकर यांनी लिहिले असून अनुराधा पौडवाल, जयवंत कुलकर्णी, शरद जांभेकर,
चंद्रशेखर गाडगीळ, मल्लेश यांनी हे गीत गायले आहे. या गीताला अनिल मोहिले यांनी संगीत दिले आहे. या गीताचे वैशिष्ठय म्हणजे आठ गणपतींची माहिती दिली आहे तसेच अशोक सराफ, उषा चव्हाण, रवींद्र महाजनी, आशा काळे, सुधीर दळवी, जयश्री गडकर यांनाही या गाण्यात सहभागी करून घेतले आहे. 
             या गाण्याचा किस्साही मजेशीर आहे. अष्टविनायकांवर गाणे तयार करण्यासाठी शरद पिळगावकर जगदीश खेबूडकरांकडे गेले व त्यांना म्हणाले कि, "मी अष्टविनायकांवर गाणे तयार करत आहे. मला गाणे लिहून दया." जगदीश खेबुडकर म्हणाले, "मला तर अष्टविनायकांबद्दल काहीच माहिती नाही." शरद पिळगावकर म्हणाले, "काही काळजी करू नका. हे पुस्तक वाचा व यावरून तुमचे गाणे तयार करा." शरद पिळगावकरांनी खेबूडकरांच्या हाती अष्टविनायकाचे पुस्तक सोपवले व गाणे लिहायला सांगितले. खेबूडकरांनी ते पुस्तक वाचले व त्यावरून एका रात्रीत हे अवीट गोडीचे गाणे तयार झाले. अजूनही हे गाणे श्रोत्यांना मंत्रमुग्ध करते. 

 स्वस्तिश्री गणनायकं गजमुखं मोरेश्वर सिद्धीदम्‌
बल्लाळं मुरुडं विनायकं मढं चिंतामणी थेवरम्‌
लेण्यांद्रिं गिरीजात्मजं सुवरदंविघ्नेश्वरं ओझरम्‌
ग्रामोरांजण स्वस्थित: गणपती कुर्यात्‌ सदा मंगलम्‌

जय गणपती गुणपती गजवदना
आज तुझी पूजा देवा गौरीनंदना
कुडी झाली देऊळ छान काळजात सिंहासन
काळजात सिंहासन मधोमधी गजानन
दोहीकडे रिद्धिसिद्धि उभ्या ललना

अष्टविनायका तुझा महिमा कसा
दर्शनाचा लाभ घ्यावा भक्तांनी असा

गणपती, पहिला गणपती
मोरगावचा मोरेश्वर लई मोठं मंदिर
अकरा पायरी हो अकरा पायरी हो
नंदी कासव सभामंडपी नक्षी सुंदर
शोभा साजरी हो शोभा साजरी हो
मोऱ्या गोसाव्यानं घेतला वसा

गणपती, दुसरा गणपती
थेऊर गावचा चिंतामणी
कहाणी त्याची लई लई जुनी
काय सांगू डाव्या सोंड्याचं नवाल केलं साऱ्यांनी
विस्तार त्याचा केला थोरल्या पेशव्यानी
रमा बाईला अमर केलं वृंदावनी
जो चिंता हरतो मनातली चिंतामणी
भगताच्या मनी त्याचा अजूनी ठसा

गणपती, तिसरा गणपती
सिद्धिविनायका तुझं सिद्धटेक गाव रं
पायावरी डोई तुझ्या भगताला पाव रं
दैत्यामारु कैकवार गांजलं हे नगर
विष्णुनारायण गाई गणपतीचा मंतर
टापूस मेलं नवाल झालं टेकावरी देऊळ आलं
लांबरुंद गाभाऱ्याला पितळेचं मखर
चंद्र सूर्य गरुडाची भोवती कलाकुसर
मंडपात आरतीला खुशाल बसा

गणपती, चौथा गणपती
पायी रांजणगावचा देव महागणपती
दहा तोंड हिचं हात जणू मूर्तीला म्हणती
गजा घालितो आसन डोळं भरुन दर्शन
सूर्य फेकी मूर्तीभर वेळ साधून किरण
किती गुणगान गावं किती करावी गणती
पुण्याईचं दान घ्यावं ओंजळ पसा

गणपती, पाचवा गणपती
ओझरचा इघ्नेश्वर लांब रुंद होई मूर्ती
जड जवाहीर त्याचं काय सांगू शिरीमंती
डोळ्यामंदी माणकं हो हिरा शोभतो कपाळा
तहानभूक हरपती हो सारा बघून सोहळा
चारी बाजू तटबंदी मधी गणाचं मंदिर
इघ्नहारी इघ्नहर्ता स्वयंभू जसा

गणपती, सहावा गणपती
लेण्याद्री डोंगरावरी नदीच्या तीरी
गणाची स्वारी तयार गिरिजात्मक हे नाव
दगडामंदी कोरलाय्‌ भक्तिभाव
रमती इथे रंका संगती राव
शिवनेरी गडावर जल्म शिवाचा झाला हो
लेण्याद्री गणानी पाठी आशिर्वाद केला हो
पुत्राने पित्याला जन्माचा प्रसाद दिला हो
किरपेने गणाच्या शिवबा धाऊनी आला हो
खडकात केले खोदकाम दगडात मंडपी खांब
वाघ सिंह हत्ती लई मोठं दगडात भव्य मुखवट
गणेश माझा पुत्र असावा ध्यास पार्वतीचा
आणि गिरिजात्मज हा तिनं बनवला पुतळा मातीचा
दगडमाती रुपदेवाचं लेण्याद्री जसा

सातवा गणपती राया
महड गावाची महसूर वरदविनायकाचं तिथं एक मंदिर
मंदिर लई सादसूद जसं कौलारू घर
घुमटाचा कळस सोनेरी नक्षी नागाची कळसाच्यावर
सपनात भक्ताला कळं देवळाच्या मागं आहे तळं
मूर्ती गणाची पाण्यात मिळं त्यानी बांधलं तिथं देऊळ
दगडी महिरप सिंहासनी या प्रसन्न मंगलमूर्ती हो
वरदानाला विनायकाची पूजा कराया येती हो
चतुर्थीला गर्दी होई रात्रंदिवसा

आठवा आठवा गणपती आठवा
पाली गावच्या बल्लाळेश्वरा आदिदेव तू बुद्धीसागरा
स्वयंभू मूर्ती पूर्वाभिमूख सूर्यनारायण करी कौतुक
डाव्या सोंडेचे रूप साजिरे कपाळ विशाळ डोळ्यात हिरे
चिरेबंद या भक्कम भिंती देवाच्या भक्तीला कशाची भीती
ब्रम्हानंदी जीव होई वेडा की पिसा

मोरया मोरया मंगलमूर्ती, मोरया मोरया मयुरेश्वरा मोरया
मोरया मोरया चिंतामणी मोरया, मोरया मोरया सिद्धिविनायक मोरया
मोरया मोरया महागणपती मोरया, मोरया मोरया विघ्नेश्वरा मोरया
मोरया मोरया गिरिजात्मजा मोरया, मोरया मोरया वरदविनायक मोरया
मोरया मोरया बल्लाळेश्वर मोरया, मोरया मोरया अष्टविनायक मोरया