भारताच्या "सुवर्ण" कन्या, पी. व्ही. सिंधू व मानसी जोशी

पी. व्ही. सिंधू व मानसी जोशी

भारताच्या "सुवर्ण" कन्या, पी. व्ही. सिंधू व मानसी जोशी 

               पी व्ही सिंधू आणि मानसी जोशीने जागतिक बॅडमिंटन स्पर्धेत सुवर्णपदक जिंकून भारतीय क्रीडाविश्वात आपले नाव कोरले. दोघीनी स्पर्धा जिंकून आपल्या देशाची मान उंचावली आहे. पी व्ही सिंधूने जागतिक बॅडमिंटन स्पर्धेचे विजेतेपद जिंकून बॅडमिंटनमधील जागतिक विजेतेपद मिळवणारी पहिली भारतीय महिला ठरली आहे. ऑलम्पिक स्पर्धेत रौप्यपदक जिंकणाऱ्या सिंधूने जागतिक स्पर्धेचे दिमाखात विजेतेपद पटकाविले. रविवारी झालेल्या अंतिम सामन्यात सिंधूने जपानच्या नोजोमी आकूहीरा हिला ३८ मिनिटाच्या खेळात २१-७ आणि २१-७ अशा दोन सेटमध्ये पराभूत करून ऐतिहासिक कामगिरी केली. 

                  सिंधू ऐतिहासिक कामगिरी करत असताना त्याच दिवशी आणखी एका भारतीय महिलेने बॅडमिंटनमध्ये जागतिक विजेतेपद जिंकून ऐतिहासिक कामगिरी केली. या महिलेचे नाव आहे मानसी जोशी. स्विजरलँडमधील बेसल येथे झालेल्या स्पर्धेत मानसी पारुल परमार हिच्याशी लढली होती. अपंग असलेल्या मानसीला एक पाय नसताना त्या ठिकाणी कृत्रिम पाय बसवण्यात आला आहे. ३० वर्षीय मानसीच्या दुचाकीला अपघात झाला होता. त्यात तिने आपला पाय गमावला. तरीही तिने हार न मानता कष्टाच्या जोरावर उभी राहिली व जागतिक विजेतेपदाचे ध्येय साध्य केले. 

                    बॅडमिंटनच्या जागतिक स्पर्धेत सिंघू सहावेळा सहभागी झाली त्यातील पाच स्पर्धेत तिने पदके पटकावली. २०१३ साली कांस्य पदक, २०१४ साली कांस्य पदक, २०१७ साली रौप्य पदक, २०१८ साली रौप्य पदक, २०१९ साली सुवर्ण पदक. अशी पदके पटकावून तिने जागतिक स्पर्धेत आपल्या खेळाचा ठसा उमटवला आहे. सिंधू व मानसी जोशी या दोघीही गोपीचंद यांच्या शिष्या आहेत. दोघीनींही सुवर्णपदक जिंकून आपल्या गुरुचे नाव उंचावले आहे.