अवीट गोडीचे गाणे -- आला आला वारा संगे पावसाच्या धारा
हे गाणे "हा खेळ सावल्यांचा" या चित्रपटातील आहे. या गीताला संगीत पंडित हृदयनाथ मंगेशकर यांनी दिले असून सुधीर मोघे यांनी हे गीत लिहिले आहे. या गीताला स्वर अनुराधा पौडवाल व आशा भोसले यांचा लाभला आहे. हे गीत आशा काळे यांच्यावर चित्रित झाले आहे. नायिका आशा काळे व तिच्या मैत्रिणी भाताच्या शेतात काम करत असताना हे गीत म्हणतात.
आला आला वारा संगे पावसाच्या धारा
पाठवणी करा सया निघाल्या सासुरा
सया निघाल्या सासुरा ।। धृ ।।
नव्या नवतीचं बाई लकाकतं रूप
माखलं ग ऊन जणू हळदीचा लेप
ओठी हसू पापणीत आसवांचा झरा
सया निघाल्या सासुरा ।। १ ।।
आजवरी यांना किती जपलं जपलं
काळजाचं पाणी किती शिंपलं शिंपलं
चेतवून प्राण यांना दिला ग उबारा
सया निघाल्या सासुरा ।। २ ।।
येगळी माती आता ग येगळी दुनिया
आभाळाची माया बाई करील किमया
फुललं बाई पावसानं मुलुख ग सारा
सया निघाल्या सासुरा ।। ३ ।।
आला आला वारा संगे पावसाच्या धारा
पाठवणी करा सया निघाल्या सासुरा
सया निघाल्या सासुरा ।।
गीत - सुधीर मोघे
संगीत - पं. हृदयनाथ मंगेशकर
स्वर - अनुराधा पौडवाल
चित्रपट - हा खेळ सावल्यांचा
No comments:
Post a Comment